محكمة

كتب Mostafa Al Shall


المدونة دى يا جماعة اسمها صورة ساخرة
يعنى بنهتم بالصور والتعليق عليها
واليوم الصورة بتاعتنا معبرة عن مضمونها وهى عبارة عن حكاية
أعتقد أنها مفهومة
والنظام اللى فى الصورة ده أظن أنه مكرر كتير فى الواقع الى بنعيشه
المحسوبية والواسطة و خلى عندك معارف علشان ينفعوك وقت ما تتمسك
أسيبكم بقى ما الصورة وعايز أعرف تعليقاتكم على النظام ده

لا عزاء للأطباء

كتب Mostafa Al Shall



أثارنى خبر وزير الصحة برغبته فى الغاء تكليف الاطباء


أنا مش عارف الناس دى عايزه ايه


يعنى لو معينتوش الدكاترة


هتعينوا مين؟؟؟؟


ولا تعب الواحد كدا راح فشوش




يعنى الواحد مننا طلعت عينه فى الثانوية وكمان طلعت عينه التانية فى الكلية وهيدرس سبع سنين وفى الاخر مفيش شغل




انا كنت عارف اللى هما مش هايسبونا فى حالنا لازم كدا




بس بيقولوا حمدى السيد نقيب الاطباء مهدد يعمل اعتصام ومظاهرات


والراجل فى دى عنده حق




مش كفاية شغلنا طول السنة امتحانات امتحانات وبعد دا كل مفيش تكليف


المهم ان وزير الصحة بيتحجج أن احنا عندنا طبيب لكل 300 مواطن




ياسيدى الفاضل مصر كبيرة ومحتاجة أطباء كمان عندك كوريا فيها طبيب لكل 52 مواطن واحنا مساحتنا أكبر بكتير من كوريا طبعا


ناهيك عن الامراض التى تعصف بالمصريين




مرضى الكبد يتزايدون يوميا مرضى السكر وغيرها من الامراض التى تتزايد يوميا




بتقولوا ان الطلبة المتخريجين كل عام حوالى 7الاف و500 طالب


سياسية دخول الطلاب الكلية دى انتم المسؤلين عنها


ليه العدد الكبير دة انتم رفعتم التنسيق والطلبة ذاكرت خلاص الموضوع مفروغ منه




يعنى بايدكم تخفضوا أعداد المقبولين




وخير مثال جامعة اكسفورد فى المملكة المتحدة


عدد المقبولين فى الطب كل عام500 طالب فقط بضمن لك فى الاخر تخريج أطباء أكفاء




مشكلة أخرى سيدى الفاضل مهنة الطب هذه تحتاج الى ممارسة وباستمرار حتى نجيد المهنة


احنا كدا بنقضى على مستقبل الطب فى مصر


أرجوكم لا تفعلوا ذلك


يكفيكم ما فعلتموه




ولا ايه يا جماعة عايز رأيكم فى الموضوع ده

حليت مشكلة كوندى

كتب Mostafa Al Shall



اتكعبلت فى خبر ويا ريتنى ما اتكعبلت بيقولوا أن شوكت عزيز واللى أصبح الوقتى ذليل حاول التحرش بكوندى


والكلام دا طلع فى كتاب عن سيرة الست كوندى اللى ملت الدنيا نور واشعاع وبقت سيرتها على كل لسان

والراجل اللى كاتب الكتاب بتاع كوندوليزا رايس

بيقول أن رئيس الوزراء ده بيفتخر أنه يقدر يوقع أى امرأة فى حباله

ياراجل مش دى طب وقع ناس تانية


خلاص اتعميت مفيش غير دى

طيب اللى غاظنى بقى انه مسلم

لا حول ولا قوة الا بالله


كوندى لحست عقل الراجل طيب شوفو الصور دى وقولو لى دى لحست عقله ازاى


قولولى عمل كدا على اى مبدأ








أما أنا بقى جتلى فكرة انما ايه هتحل الموضوع ؟




احنا نلم الموضوع عائلى كدا وكوندى لسه آنسة




وطبعا انتم شوفتم جمالها وقدراتها من الصور؟




ايه رأيكم ندخلها دنيا؟




ونخطبها لرئيس الوزراء الباكستانى واهو نكسب فيها ثواب




يلا نشوفها بفستان الفرح ههههههههه



أظن أنا كدا عملت اللى على ولا ايه؟
مع السلامة بقى فى صورة أخرى

أنا وأمريكا

كتب Mostafa Al Shall


بسم الله الرحمن الرحيم

اليوم استرجعت بذاكرتى أيام الدراسة الإعدادية

كان الواحد لسه صغير وفى يوم سمعت على أمريكا واللى بتعملوا فى العالم ويومها حطيت مشروعى لكى أضبط أمريكا وأحل كل المشاكل اللى تاعبه الناس

والفكرة طرقعت فى دماغى وفى اليوم التالى قمت من نومى وتوجهت للمدرسة علشان أقابل زمايلى وأحكيلهم على الخطة

ووقفت وقلتلهم خلاص أنتم عارفين أن نفسى فى ايه؟



كل الطلبة بصت فيه ايه؟

قلت لهم أنا عايز ابقى رئيس أمريكا


قلتها وأنا مغمض عينى ولما فتحت لم أجد ولا طالب

بس على مين

رحت بقى للفرقة بتاعتى فى الفصل وشرحت لهم أبعاد القضية
قلت لهم ما هولماأبقى رئيس أمريكا طبعا هاقعد فى الحكم حوالى سنتين وبعد كدا أفرض اللغة العربية للتدريس فى المدارس اجبارى من الحضانة وأبدأ أدرس لهم الإسلام وكل دا كنت حاسب أنه هيستغرق 9 سنين وبعدين أعرب الدواوين وبعدين أفرض الإسلام ديانة رسمية وأنضم لجامعة الدول العربية كل دا هايخد 30 سنة
أصل أنا كنت فاكر اللى الرئيس هناك زى هنا
ويادى الخيبة لما أفتكر الكلام دا دلوقتى بموت من الضحك
ايه رأيكم فى تفكيرى وأنا فى تانية اعدادى؟

اوعى تقول زى ما قلولى ايامها


انتظروا لسا فيها حاجات تانية دا كنت داهية تفكير فى الاعدادى ولسه